JAMITA BORU KEHE

MARSAPA TU NATOBANG

Assalamu’alaikum Wr.Wb.

Salam dohot hormatku tu sude hita koum marsisolkot.

Parjolo mai hormat tu barisan kahanggi, anakboru, mora, natobang natoras dohot napatut, pangait pangatogu ni banua on, tar pasurung tar palobi mai tu oppui namijur sian bagas godang.

Tutu madai nakkinini di torang ni ari, ro madai taon-taon nami di hita koum marsisolkot anso dapot hadir tu bagas on dung salose solat isya.

Mudah-mudahna tombal naso marhalangan, maradu koum sisolkot, dapot dope mangurupi undangan nami.

Tibo nakkinin lalu hita tu
bagas on, parjolo mai hami manghidangkon Tes si inumon. Mare ma hita parrasokion dohot ucapan bismillahirromanirrohim.

Dungi buse, songonon juo ma hami namarsapa tu jolo ni natobang, adongdope luai abat janggalna hami nagiot mandok hata si dohonon nami?

Tar boti mada jolo hata sapa-sapa nami, urang dohot lobina au parjolo mangido moof dohot mangido izin.

Wasslamau’alaikum Wr.Wb.

JAMITA BORU KEHE

Assalamu’alaikum Wr.Wb.

Baen madung nakkinin hami marsapa tu jolo ni natobang, sanga adong dope abat janggalna di hami nagiot mandokon hata sidohonon.

Mudah-mudahan dapot dope disambut natobang.

Muda madung hadir maradu undangan, songoni muse madung dapot dihita hasaya ni namarhuta, pasampe hamu ma aha tarangan-angan di roha muyu tarboti doi halus ni natobang, antong arani i marjamita majolo saotik satottang ni boru nami namargoar .......... madung godang pamatangna, madung dewasa pemikiranna, nabiaso boru nami on muda potang si dumadang ari, lakka mai tu pangajian sanga tu bagas padomanna, muda dapot torang ni ari ro do ibana tu bagas on manolongi inangna manjama aha natupa di tanganna, nakkin di sogot ni ari madung songon naginjang panaili sumadang ari boru nami leng naso mulak tu bagas nami, hami suru do anggina mangaligi tu bagas podomanna songoni tu tapian paridianna, boi ia tu halaman parmayamanna.

Samulak ni anggina leng so tarpaida di ibana, sian i timbul mai somak ni roha, marlagutdo hami namarkamaranggi songoni anakboru nami, tai tumahi ma hami, disimpul ni tahi ro do hata ni anakboru nami, on da morakku sada arsak ni roha mada di hita on, inda tarpasip hita on be, songon nama ngongom sorbuk akkon jalob do hita jamitaon on tu pangait pangatogu ni banua on, tarlobi-lobi tu oppu raja, tarboti hata ni anakboru nami, on mai dalan-dalanna baen naro undangan nami tu hita koum marsisolkot, songononma hami namarjamita, bahaso boru nami nadi bagas on, indabe di bagasan pamoliharoan nami.

Anggo atak dohot etong ni on nahurang do sinaloan nami dison, songonma hami namanyorahon tu maradu kahanggi anakboru, mora, natobang dohot napatut, muli ni hata tu oppu i namijur sian bagas godang, tarbotima hata patujolona.

Tai baen dison dope kahanggi songoni anakboru nami namalo patama hata, dipatama dipatupa hata on so dalan tepat tu tujuanna. Tarbotima hatana sian au, urang dohot lobina au parjolo mangido moof dohot mangido izin.

Wassalamua’alaikum Wr.Wb

KAHANGGI MANGUDURKON

Assalamu’alaikum Wr.Wb.

Maruppak Madai Hayu Lippata

Nasonggopan ni Unggas Hatutu

Maruduran ma dai Hata

Songon na Mangite di Ginjang Gadu

Di Hata Jamita ni kahanggi na parjolo makkuling,  leng di hula-ulak  mada songoni, songon namangusa-usa botohon, tandona mai iba nasahata.

Takkas madai nakkinin di torang ni ari i ro taon-taon nami tu sude hita koum marsisolkot so dalan dapot hadir tu bagason dung salose sholat isya.

Mudah-mudahan, maradu koum sisolkot madung dapot hadir mangurupi ungdangan nami.

Attong muda jamita satottang gadis nami nasi kon bagason. Madung dai banjar di pajojor kahanggi ngada adong sala dohot silina.

Harana ni somak, dohot arsak ni roha nama mada i,  so hami parlagutkon hita koum marsisolkot harana leng tu kahanggi do da parjolo dongan marpokat, anak boru pangidoan gogo mora pangualan bisuk, natobang na toras nahum maboto apalagi oppu raja do na pataya-taya uhum dohot ugari.

Leng tu hamu madai hami soraon atak dohot etong nion. Godang nian harapan nami anso dapot di sambut dohot di tarimo, di hata jamita nami on.

Tarboti majolo hata sian hami on, tai baen di son dope anak boru nami, di tambah nian hata on anso dapat topet tu payakanna.

Tarsaima hatana hurang dohot lobina au mangido moop.

Wassalamua’alaikum Wr.Wb

ANAK BORU MANGUDURKON

Salam dohot hormat parjolo ma itu barisan mora markamaranggi, natobang dohot napatut di pasurung di palobi tu oppui na mijur sian bagas godang.

Muda hami anak boru ngada na manambai hata ni mora. Taringot di jamita madung banjar songon panyuan ni jegang, baris-baris songon panyuan ni eme.

Tinggal dei muda hai sian anak boru na dohot manyoraonma hamion tu natobang natoras, lobi-lobi tu oppui na mijur sian bagas godang, anso dapot nian disambut disaluangi ulang songon si ngot-ngot  di bagasan ngadol di parasaan ni morakku di bagason.

Tarboti ma hata na mangudurkon hata ni mora, urang dohot lobina au mangido maaf mangido izin.

Wassalamua’alaikum Wr.Wb

KAHANGGI MANGALUSI

Manyambut manyaluangi di jamita ni kahanggi da. Mar kabotulan madai dalan-dalan ni parlagutannta, sian taon-taon ni kahanggi tu hita koum marsi solkot so dalan dapot hadir tubagason dung salose solat isya.

Mudah-mudahan bagi hita na mar kasompatan madung dai dapot mangurupi undangan ni kahanngi.

Satibo nakkin lalu tu bagason kahanggi menyambut di harorotta salaos manghidangkon tes siinumon nadi alamatkan tu hita buat parrasokianna,

Satorusna kahanggi marsapa tu natobangta sanga adong dope abat janggalna namandok hata sidohonon, takkas mai nakkini disambut natobangta, ngada adong abat bikkolangna muda madung hadir maradu undangan ni kahanggi, songoni muse dapot di hita hasaya ni namarkuta, banjari hamu ma hata sidohonan muyu tarboti alus ni natobang.

Sian kahanggi mandan-dan hata satottang jamita ni borutta di bagason, namuba markoti sion nabiaso. Rupana hara ni somak ni roha ni kahanggi  pada maso i, di palagut mai hita markamaranggi songoni anak borutta tai-tumahi.

Pumu ni tahi, botul madai anak borutta nabisuk, namanjadi sulu mai di nagolap, patorang dalan anso tarida dihita namar kahanngi.

On mai dalan-dalanna anso di palagut hita koum marsisolkot anso dijamitaon pangalao ni gadis na sian bagason baen nada be tar paida di mata simangolangna.

Attong muda menyambut parjolo di Jamita ni kahanggi, na manjagit maon tondi dohot badan. Madung sahat na honok do dai kahanggi nami..... Harana, hita do attong na sa anak dohot sa boru, songon namarsada ina. Muda na samarga sapangittubu suang maon nasabutuha, totop doi padomu roha.

Leng hita do nasabile samalu saarsak dohot sasomak ni roha. Attong muda satottang jamita  on, muda madabu akkon di joloan mai, muda mayup akkon di langean muda namago attong akkon nadijahan. Ulang ro di hita tolpuk ni roha.

Tinggal doi baen disondope anak borutta, pangidoan gogo, mora pangualan bisuk, natobang perguruan, oppu raja na pataya-taya uhum dohot ugari.

Uba leng tu halai mada joto hita sorahon. Muda dung sambut ni halai aru au pe sian kahanggi nadohot sambut ku mai.

Tarboti ma jolo hatana namangalusi jamita ni kahanggi, tai baen dison dope maradu kahannggi songoni anak boru, di patama di patupa hataon so payak tumbuk tu payakanna.

Tarboti ma, urang dohot lobina au mangido moof dahot mangido izin.

Assalamu’alaikum wr. wb

ANAK BORU MANGALUSI

Sattabi sappulu, sappulu noli au marsattabi di tua sahala ni parlagutannta. Dohot bahat mai hormatku tu barisan morakku mar kamaranggi, mora ni mora, natobang natoras, napatut, pangait pangatogu ni banua on, di pasurung di palobi tu oppui raja na mijur sian bagas godang, pada umumna hita koum marsisolkot nadung dapot marlingkar di bagas na martua on.

Manyambut manyaluangi hata jamita ni morakku muda  hami sian anak boru na sambut na honok do dai morakku.

Hami jujung do tua ni mora, hami toppi-toppi daulatna. Muda arsak ni mora nami, dohot madai hami sian anak boru mar somak ni roha.

Attong baen landasan ni jamita, satottang par serean ni mora, nadabe tarpaida di simanyolong. On ma nadi pasahat tu hita koum marsisolkot, lobi-lobi tu oppu raja.

Attong muda hami sian anak boru, muda na jalahan bo ia lalu tu ujung dalan anggo hami anakboru nagadai mangilak, songon tano di tinggang udan.

Tinggal baen madung runggu do hita di parlaguttkon mora. Na tardiri sian hasaya ni namarhuta, natobang natoras, muli ni hata di oppu raja, tuson mada i hita soraon. Muda dung sambut ni halai, manuppak mangasu di si madai hami sian anak boru.

Tarboti ma jolo hatana namangalusi jamita ni mora , urang dohot lobina au mangido moof dohot mangido izin.

Assalamu’alaikum wr. wb  

MORA MANGALUSI I

Salam dohot hormat........ pada umumna hita koum mar sisolkot nadung marlingkar di bagas na martua on.

Muda hami na manyulangi di jamita muyu anak boru nami, mambege sian tutur dohot tarombo, tutu madai sere lappang nami na mardakka mar halopa di natubuan si nuan buyu.

On mai di halak babere di bagasan nadung simbur-simbur magodang, mulo menek lopus magodang, na di puli aro dohot di bolo, ulang nian bage mauha.

Rupana di sada katiko di naek ni sumadang ari babere on ngada be tarpaida. Hara ni i timbul mai di hamu arsak dohot somak ni roha. On mai anso di parlagutkon hita koum marsisolkot.

Songonon rupa hamu na marjamita salaos pasahat patanggalkon. Tu sude hita koum marsisolkot bahaso babere ngada di bagasan pamuliaroan muyu be.

Attong muda mambege sian alus ni kahanggi muyu songoni anak boruna ngada na marsiagoan totop doi padomu roha. Harana hamu da na sabile dohot samalu sa arsak dohot sa somak ni roha.

Aru hami pe sian mora muyu menyambut manyaluangi di jamita muyu anak boru nami, madung dai sahat tu hami, ngabe hamu na halungalan di jamita.

Tinggal doi, baen babere nikkomu madung godang do pamatangna nga sei binoto madung lakka do ibana, mangalakkahon lakkana.

Leng di suru mada jolo anak boru muyu na manaek mijur di bagason mangaligi tu bilik podomanna.

Appot adong barang na marubaan naso biaso adong di bagason.

Tarboti majolo ulak ni hata.

Assalamu’alaikum wr. wb

Keterangan :

Di oban anak boru mai par tinggal tu jolo ni raja dohot hatana :

On mai barang naso biaso adong di bagas ni mora on na dapot balun di amakna. Songonon ma hami sian anak boru, na manyorahon tu natobang lobi-lobi tu oppu raja na pataya-taya uhum dohot ugari

MORA MANGALUSI II

(Mora Manyambung Hata)

Tutu madai, hami parulakkon hata tu hamu. Buat mangalului tu bilik podomanna appot adong na di tinggalkonna.

Rupa on mai nadung di soraon tu jolo ni raja barang naso biaso di bagason na dapot balut di amakna.

Attong muda ukir-ukir ni on, leng tu natobang ta madai hita sorahon, lobi-lobi attong tu oppu raja na mamboto Urat dohot lopok ni pangalaho. Haru hami pe sian mora na man don-doni ma di jamita ni anak boru nami anso dapoton nian mar tinanda songon adian mar panuju songon dalan ulang ro somak ni roha di anak boru nami di bagason.

Tarbotima hatana urang dohot lobina au mangido moop mangido ijin.

Assalamu’alaikum wr. wb 

NA TOBANG MANGALUSI I

Salam dohot hormat ................

Muda ham isian natobang, mambege hata jamita dohot nadi pasahat, madung dai di sambut saluangi maradu kahanggi muyu songoni di anak boru muyu, muda sambut ni mora muyu baen gadis muyu nadung godang do pamatangna, nga sai binoto madung ma ngalakkahon lakkana do ibana anso di pareso jolo bilik podomanna appot adong barang na di tinggalkonnna, tarboti hata ni mora muyu.

Attong baen madung nakkinin di sorahon anak boru muyu, on mai barang nadi tinggalkonna na dapot balun di amakna mangiyutkon di son. Ngada on arsak ni roha be di hamu on.

Botul mai gadis muyu on mangalakkahon lakkana nadi oban ni anak ni namora dohot na mar uhum. Madung buat-buatan ni anak boru muyu maon.

Sian i  baen anak boru muyu adong do di bagason, appot na markonding di si tumudu mar kolip di si tualang do halai.

Leng di sapa jolo naka boru muyu sanga na buat-buatan ni ibana do on ?

Tarboti majolo sapa-sapa nami sian natobang.

Assalamu’alaikum wr. wb

Alus ni anak boru :

Iya bo manurut na di tinggalkon naon, tutu madai buat-buatan ni anak nami. Tinggalna, muda di bagas nami, songoni di bagas bariba. Ngada adong na maso namuba. Tinggal dei baen hami na baat suang doi Balakka di tonga padang, na pahae barumun pahulu sosa.

Leng martanggu mada jolo, muda na donok dua noli tolu ari, muda na dao dua noli putu ari. Muda ngada ro kahanggi ki, au noma sian anak boru marjamita tu jolo ni morakku songoni tu oppu raja.

Tarboti ma tanggu-tanggu nami, urang lobina mangido moof mangido izin

Assalamu’alaikum wr. wb

NA TOBANG MANGALUSI II

(Natobang Manyambung Hata)

Baen madung di aku anak boru muyu, bahaso mangidaon di nadi tinggalkon naon buat-buatan ni anak ni ibana ma on, na maroban parserean ni morana.

Tinggal baen di bagasna napodo adong namaso na muba, tai baen halai nabahat di jae dohot di julu, uba leng ni pangakuan ni ibana mada jolo hita paitte.

Atoong baen madung na juguk do di bagason oppu nami jur sian bagas godang na mamboto uhum dohot ugari godang madai haropan nami sian natobang anso dapot pasippul jamita on,

Di bobok songon sapu, di balun songon bide, di ikat songon tali, ulang ro domaon arsak di  namar kasuhuton.

Tarsaima hata mangalusi sian hami natobang, urang dohot lobina au mangido moof mangido izin.

Assalamu’alaikum wr. wb